Bwriad y cynllun profi defnyddio tanwydd yw darparu gwybodaeth i brynwyr ceir a fydd yn eu galluogi i gymharu faint o danwydd a ddefnyddir gan wahanol fodelau mewn profion safonol.

Mae’n rhaid i bron pob model o gar newydd sy’n cael ei gymeradwyo ar gyfer ei werthu yn Ewrop gael ei brofi i ganfod faint o danwydd mae’n ei ddefnyddio. Mae’r llyfryn hwn yn cynnwys canlyniadau’r profion hynny a dderbyniwyd gan yr Adran Drafnidiaeth ar gyfer ceir newydd y disgwylir iddynt fod ar werth ar ôl Mai 2004.

BETH YW'R PROFION SAFONOL?

Mae gweithdrefnau profi defnyddio tanwydd swyddogol wedi bod mewn grym ers yr 1970au. Mae Cyfarwyddeb 1999/100/EC yr UE yn disgrifio’r profion y mae’n rhaid eu cynnal ar bob car newydd sydd ar werth ers Ionawr 2001. Mae’r holl ffigurau defnyddio tanwydd yn y llyfryn hwn yn seiliedig ar ganlyniadau’r profion hynny.

PRAWF DEFNYDD TANWYDD (Cyfarwyddyd 1999/100/EC)

Cafwyd cytundeb rhyngwladol ar y prawf newydd ac mae’n rhoi canlyniadau sy’n gynrychioliad tecach o ddefnyddio tanwydd ar-y-ffordd na’r profion blaenorol. Mae dwy ran i’r prawf: cylch trefol ac alldrefol. Yr un yw’r cylch profi â’r un a ddefnyddir ar hyn o bryd i bennu dosbarthiad allyriant egsost swyddogol ar gyfer y model o’r cerbyd dan sylw.

Mae’n rhaid i’r ceir a brofir fod wedi cael eu gyrru eisoes ac mae’n rhaid iddynt fod wedi cael eu gyrru am o leiaf 1,800 milltir (3,000 cilomedr) cyn y prawf.

Y Cylch Trefol
Mae’r cylch profi trefol yn cael ei gynnal ar ffordd droellog mewn labordy lle mae’r tymheredd amgylchol rhwng 20°C a 30°C gydag injan oer, hynny yw, nid yw’r injan wedi ei rhedeg ers nifer o oriau. Mae’r cylch yn cynnwys cyfres o gyflymiadau, cyflymderau cyson, arafiadau ac injan segur. Y cyflymder uchaf yw 31 mya (50 km/h), cyflymder cyfartalog o 12 mya (19 km/h) ac mae’r pellter a deithir yn 2.5 milltir (4 km). Dangosir y cylch fel Rhan Un yn y diagram isod.

Cylch alldrefol
Mae’r cylch hwn yn cael ei gynnal yn syth ar ôl y cylch trefol ac yn ystod y rhan fwyaf ohono mae’r car yn cael ei yrru ar gyflymder cyson gyda’r gweddill yn gyflymiadau, arafiadau, a pheth injan segur. Mae’r cyflymder uchaf yn 75 mya (120 km/h), mae’r cyflymder cyfartalog yn 39 mya (63 km/h) ac mae’r pellter a deithir yn 4.3 milltir (7 km). Dangosir y cylch fel Rhan Dau yn y diagram isod.

Ffigur Defnyddio Tanwydd Cyfunol
Mae’r ffigur cyfunol a roddir yn cynnwys y ffigurau ar gyfer y cylch trefol a’r cylch alldrefol gyda’i gilydd. Mae’r ffigur cyfunol felly’n ffigur cyfartalog o ddwy ran y prawf, wedi eu haddasu yn ôl y pellter a deithir yn y ddwy ran.

CERBYDAU SY'N RHEDEG AR DDAU FATH O DANWYDD

Mae gofyn bod cerbydau a ddyluniwyd i redeg ar NPH neu NNC a Phetrol yn cael eu profi ar y ddau danwydd. O ganlyniad, bydd dwy set o ffigurau'n ymddangos ar gyfer cerbyd sy'n rhedeg ar ddau fath o danwydd, un set ar gyfer y cerbyd pan fo'n rhedeg ar betrol a set arall pan fo'n rhedeg ar nwy.